சக்தி ஜோதியின் இரு கவிதைகள்...

காலையில் வாசித்த சக்தி ஜோதியின் இரு கவிதைகள்...

அலைச்சல்

காற்றின் ஈரத்தை

உணவாக்கி

உயிர்த்திருக்கும்

மரமென

அடி பெருத்து அசைகின்ற

முத்தம் ஒன்றை

நீண்ட அலகுடைய

கனவுப்பறவை

கொத்திக் கொண்டு செல்கிறது

பாலைவன மெங்கும்

இன்னும்

ஒருமுத்தம் தேடி.

வெளிப்பாடு

உன் நினைவில்

தாமரைக் கொடியெனச்

சுகித்திருக்க

கதிர்களால் உயிரூட்டுகின்றாய்

உன்னை விட்டகன்றால்

பிரிவுத்துயர்

என்னை வாட்ட

காய்ந்துச் சாகின்றேன்

நெருப்பை விழுங்கிக் கொண்டு

குளிர் ஒளியை வெளியெங்கும்

விரிக்கும் நிலவென

பிரிவின் வாதையைச் சுமந்து கொண்டு

புன்னகையோடு உற்றோரை

எதிர்கொள்கிறேன்

உன்னைப் பிரிகையில்

பெருகும் துயரத்திற்குக்

குறைந்தது இல்லை

நினைவின் மகிழ்வு.